لولي في العجمي

البحر ده حاجة صعبة أوي

أنا كنت هاموت من الخوف

لما ماما نزلتني البحر وبابا مسكني جامد

كنت خايفة أغرق

بس بعد كده لما طلعت من المية

قلت لماما وبابا – بالعياط يعني- أنا مش هانزل البحر ده تاني أبدا

هما وافقوا

بس بعد كده ضحكوا عليا ونزلوني تاني

لما لبسوني المايوه

عرفت أنهم هينزلوني البحر

وقعدت أعيط وعملت نفسي نايمة عشان مانزلش

والحمدلله الخطة نجحت ومنزلتش

أنزل ولا مانزلش؟

أقعد استجم شوية

أنا كده مبسوطة وآخر تمام



خلينا على البر أحسن


وضحكت عليكم مش هانزل البحر تاني

نومة لولي

أنا بانام كده.. أنا حرة

بابا بيقول إني بانام زي حسوني أخويا

طيب أنا باحبه وبانام زيه.. مش مشكلة

مفلقسة

باكل رز مع الملايكة

زي الملايكة

جاتلي هدية حلوة أوي أول ما اتولدت

كانت عبارة عن فستان أبيض وطقية حلوة أوي

ماما لما لبستهولي قالت إني شبه الملايكة

علشان الملايكة بتلبس أبيض في أبيض

أنا مبسوطة بالفستان ده أوي

زي الملايكة أما تشوفها

ورداية تحلم تقطفها

لولي تحبي وتقعد

أنا دلوقتي باحبي وباقعد كمان

مش فاهمة ماما مبسوطة أوي بالحكاية دي

وبابا كمان وحسوني أخويا بيلعب معايا

هو أنا اتغيرت أوي كده بعد ما بقيت باحبي وباقعد؟

محدش هيحصلني

أنا باحبي وهما بيمشوا.. مين بقى الأشطر؟

مفيش تيتينا

أنا كنت مشغولة أوي الفترة اللي فاتت

عشان كده فضلت إني أبعد عن المدونة شوية

بصراحة كنت مقريفة

لأن ماما منعت عني التيتينا

وكنت متضايقة جدا ومشغولة بالعياط طول الوقت

والتيتينا وحشتني أوي

بس الحمدلله انا نسيتها خالص دلوقتي

وبقت حالتي النفسية أحسن بكتير

أنا عارفة إن ماما عملت كده عشان مصلحتي

بس أنا وقتها كنت متضايقة منها خالص

لكن أنا وماما اتصالحنا خلاص ورجعت أحبها زي الأول.

كانت لنا أيام مع التيتينا

ده أنا كنت متضايقة خالص ومش طايقة نفسي

بدون تيتينا.. ذلك أفضل جدا

أنا والتيتينا

لما باعيط من غير سبب
وماما مش بتعرف أنا باعيط ليه
بتحط لي حاجة كده مالهاش طعم ولا لون ولا ريحة
اسمها "التيتينا"أنا مش باحبها أوي
بس هي بتهديني وبتخليني أسكت
بس أنا لما باسكت بارميها من بقي بلساني
وماما بترجع تحطها لي تاني
وأنا باطلعها برضه تاني
وبافضل أضحك على التيتينا وعلى ماما

باعيط من غير سبب

ماما حطت لي التيتينا

أنا طلعتها بلساني

وضحكت على ماما وعلى التيتينا

استعنا على الشقى بالله

النهاردة أنا عندي 52 يوم بالظبط
ماما قررت تعمللي مدونة
بس أنا اللي هاكتب فيها
أنا الحقيقة وقتي كله من ساعة ما جيت الدنيا دي
بأقضيه في النوم والأكل والعياط
هاحاول أفضي نفسي شوية وأكتب في المدونة
عشان أملاها وتبقى زي مدونة أخويا حسوني
http://www.abu3ly.blogspot.com/
ويا رب أكبر بقى عشان أبقى زيه
أنا من النهاردة هاكتب يومياتي
بس لما أكون صاحية
وأهو ألاقي حاجة تشغلني بدل ما أنا مشغولة بالرضاعة والعياط
لأني بصراحة قبل المدونة دي ماكنتش بالاقي حاجة اعملها فكنت كل ما ازهق أعيط أو أرضع

استعنا على الشقى بالله

أول صورة وأنا في بطن ماما

أول صورة بعد ما شرفت للدنيا

نهارنا فل